„Þú verður að tala við KA um þessar sögusagnir," sagði Túfa í viðtali eftir leikinn í gær aðspurður út í Rodrigo en Óli Stefán Flóventsson, þjálfari KA, vildi lítið tjá sig um sögusagnirnar eftir leik KA og HK í fyrradag.

Óli Stefán þekkir Rodrigo gríðarlega vel en hann hefur þjálfað hann bæði hjá Grindavík og Sindra. Óli Stefán fékk Rodrigo til Sindra árið 2014 og leikmaðurinn fylgdi honum síðan í Grindavík þar sem hann hefur spilað undanfarin fjögur ár.

Hinn þrítugi Rodrigo hefur verið í stóru hlutverki hjá Grindavík undanfarin ár en í sumar hefur hann spilað átján leiki í Pepsi Max-deildinni.

Grindavík er sex stigum á eftir KA þegar tvær umferðir eru eftir í Pepsi Max-deildinni og vonir liðsins á að bjarga sér frá falli eru litlar.