Mynd: EPA

Lærisveinar Massimiliano Allegri eru heppnir að vera komnir með tíu stig eftir sex umferðir þar sem frammistaða liðsins inni á vellinum hefur verið langt frá því að vera sannfærandi.

Fjölmiðlar á Ítalíu telja þjálfarastarf Allegri hjá Juve vera í hættu eftir ófullnægjandi byrjun á tímabilinu. Allegri var spurður út í þessar sögusagnir og segist hissa á því að starfið hans sé talið í hættu eftir það sem hann kallar 'einn slæman leik'.

„Ég fylgist ekki með svona sögusögnum. Er verið að reka Allegri? Einn slæmur leikur og þá er starfið hans Allegri í hættu samkvæmt fjölmiðlum. Það er fyndið," svaraði Allegri.

„Ég er bjartsýnn fyrir framhaldinu. Ég sagði strákunum að eyðileggja ekki landsleikjahléið fyrir mér með tapi. Ég þarf að ná smá slökun."

Juve endaði í fjórða sæti Serie A deildarinnar á síðustu leiktíð og náði þannig Meistaradeildarsæti. Liðið er þó án stiga eftir tvær fyrstu umferðirnar í riðlakeppninni.