Real Madrid hefur bæst í hóp stórliða sem eru að skoða Ísak Bergmann Jóhannesson, leikmann Norrköping í Svíþjóð.
Juni Calafat, yfirnjósnari Real Madrid, í Evrópu er sagður hafa hrifist mikið af frammistöðu Ísaks.
Calafat átti stóran þátt í því að Real Madrid fékk Martin Ödegaard í sínar raðir á sínum tíma. Spænskir fjölmiðlar segja að Ísak minni á Gareth Bale í byrjun ferilsins þar sem hann sé örvfættur og snöggur.
Hinn 17 ára gamli Ísak hefur vakið mikla athygli með Norrköping í ár en hann hefur einnig verið orðaður við Manchester United, Liverpool, Juventus og fleiri félög.
Ísak gæti spilað sinn fyrsta landsleik með Íslandi gegn Englandi á Wembley annað kvöld.
Athugasemdir