„Þetta er hræðilegt. Það verður örugglega erfitt að umgangast mig næstu sex mánuði. Ég verð erfiður maður," sagði Solbakken eftir leikinn í gær.

Norðmenn eru orðnir vanir því að sitja heima á stórmótum, síðasta mót sem þeir komust á var 2000.

Sjá einnig:
Eyðimerkurganga Noregs heldur áfram

Solbakken hefur fengið gagnrýni í fjölmiðlum þó flestir sparkspekingar Noregs séu á því að liðið sé einfaldlega ekki nægilega gott og verðskuldi ekki sæti á HM.

„Margir eru sanngjarnir en þeir sem horfa ekki raunsætt á hlutina eru oft leikmenn sem spiluðu með landsliðinu á tíunda áratugnum. Þeir sem telja sig hafa verið betri en aðrir. Þeirra álit hefur oft áhrif á almenningsálitið en ég tel að flestir norskir blaðamenn horfi raunhæft á þetta," segir Solbakken.

Sjálfur spilaði Solbakken með landsliðinu á tíunda áratugnum og greinilegt að gamlir liðsfélagar sem hafa verið að tjá sig í fjölmiðlum fara í taugarnar á honum.

Hann nafngreinir engan en Kjetil Rekdal, fyrrum landsliðsmaður, hefur verið áberandi í umræðunni í kringum landsliðið sem sérfræðingur VG. Rekdal segir erfitt að lesa í hvað Solbakken sé nákvæmlega að tala um.

„Fótbolti hefur þróast á gríðarlega miklum hraða. Ég tengist landsliðinu ekki neitt í dag en ég reyni bara að gefa mynd af því sem ég sé. Það sem mér finnst gott og það sem mér finnst slæmt. Ég ber miklar taugar til landsliðsins. Þetta hafa verið 20 ár af vonbrigðum, hver vonbrigðin á fætur öðrum," segir Rekdal.