Ajax átti að vera lítil fyrirstaða en Hollendingarnir sýndu hversu gott lið þeir eru með og slógu út Ítalíumeistarana.

Hinn 51 árs gamli Allegri hefur stýrt Juventus frá 2014 með flottum árangri. Undir hans stjórn hefur Juventus orðið deildar- og bikarmeistari fjögur tímabil í röð. Hann hefur einnig komið liðinu tvisvar í úrslitaleik Meistaradeildarinnar. Báðir úrslitaleikirnir hafa hins vegar tapast.

Eftir leikinn í gær sagði Allegri að það væri klárt mál að hann yrði áfram.

„Ég hef nú þegar talað við forseta félagsins, ég verð áfram á næsta tímabili og við erum byrjaðir að plana fyrir næstu leiktíð," sagði Allegri.

Juventus nægir jafntefli gegn Fiorentina á laugardag til þess að tryggja sér meistaratitilinn á Ítalíu áttunda árið í röð.

Conte aftur til Juventus?
Heimildarmenn Sky Sports virðast ekki svo vissir um að Allegri verði áfram stjóri Juventus. Samkvæmt heimildum miðilsins hafa forráðamenn félagsins heyrt í Antonio Conte.

Conte er fyrrum stjóri Juventus, en hann var síðast hjá Chelsea á Englandi.

Juventus á að hafa heyrt í Conte ef ske kynni að Allegri myndi yfirgefa félagið í sumar.

Conte er líka orðaður við Inter.