Southampton tekur á móti Leeds klukkan 17:00 en á sama tíma mætast Manchester United og Fulham. Með sigri tryggir Man Utd sér annað sæti deildarinnar.

Leikirnir verða sýndir í beinni útsendingu á Síminn Sport.

Sögusagnir hafa verið í gangi um að Ole Gunnar Solskjær noti þennan leik í kvöld til að undirbúa sitt lið fyrir úrslitaleik Evrópudeildarinnar sem verður í næstu viku, liðið leikur þá gegn Villarreal.

Hann vonast þó til þess að fyrirliðinn Harry Maguire verði klár í slaginn fyrir úrslitaleikinn en hann er á meiðslalistanum og spilar ekki í dag. Þá er Marcus Rashford hvíldur og byrjar á bekknum.

Það eru áhorfendur í síðustu tveimur umferðum tímabilsins, þetta er síðasti heimaleikur Manchester United og verða um 10 þúsund manns á Old Trafford. Fulham er fallið úr ensku úrvalsdeildinni.