Fyrri hálfleikurinn var nokkuð bragðdaufur og tókst hvorugu liðinu að skora í fyrri hálfleik en vindurinn setti töluvert strik í reikninginn.

Síðari hálfleikur var ekki gamall þegar Stjarnan komst yfir með marki frá Ævari Inga.

Hilmar Árni tók þá aukaspyrnu fyrir utan teig og reyndi skotið en boltinn hrökk í varnarmann Blika og þaðan til Ævars sem að setti boltann yfirvegað í netið nánast af vítapunktinum.

Blikar sóttu stíft eftir að hafa lent undir og það var varamaðurinn Aron Bjarnason sem að jafnaði leikinn fyrir Blika með stórglæsilegu marki en hann sneri boltann upp í samskeytin úr þröngu færi eftir stutta hornspyrnu. Gjörsamlega geggjað mark.

Alvöru tímabil sem @aronbjarna er að eiga. Mörk og stoðsendingar. Hæfileikaríkur og er að springa út #fotboltinet

— Magnús Már Einarsson (@maggimar) June 18, 2019

Blikar fengu aukaspyrnu á flottum stað á 77. mínútu þegar Baldur Sigurðsson braut á Guðjóni Pétri rétt fyrir utan vítateig Stjörnunnar. Guðjón Pétur tók spyrnuna sjálfur og hamraði boltanum í netið beint úr spyrnunni og kom Blikum yfir!

Best að setjann þarna bara Guðjón! Í vínkilinn!

— Egill Einarsson (@EgillGillz) June 18, 2019

Stjarnan náði lítið að ógna síðustu mínúturnar og Blikar gengu á lagið í uppbótartíma þegar Alexander Helgi innsiglaði sigurinn þegar hann skoraði þriðja mark liðsins í uppbótartíma eftir frábæran undirbúning Arons Bjarnason.

Blikar eru nú með tveggja stiga forskot á toppi deildarinnar en KR er í öðru sæti og leikur við Val á morgun. Stjarnan er í sjöunda sæti eftir leik kvöldsins.