Spænski fjölmiðillinn Marca hefur birt niðurstöðu kosningar um leikmann tímabilsins hjá Barcelona. Fjölmiðillinn stóð fyrir kosningunni.
Athygli vekur að Lionel Messi sem skorað hefur 28 mörk í 41 keppnisleik á tímabilinu var ekki valinn bestur. Markvörðurinn Marc-Andre ter Stegen, markvörður Börsunga, var fyrir ofan Messi í kosningunni.
Ungstirnin Ansu Fati og Riqui Puig voru í þriðja og fjórða sæti, en Antoine Griezmann var í 18. sæti.
Barcelona hafnar í öðru sæti spænsku úrvalsdeildarinnar á eftir erkifjendum sínum í Real Madrid. Lokaumferð deildarinnar fer fram á morgun.
Eftir tap gegn Osasuna í síðustu umferð sagði Messi: „Við erum með veikt lið og það er hægt að vinna okkur með því að vera með mikla ákefð og eldmóð gegn okkur."
Athugasemdir