„Við spiluðum flottan leik að mörgu leyti í dag. Við erum pínulítið sjálfum okkur verstir. Auðvitað er þetta hundfúlt, en að sama skapi verðum við að virða stigið," sagði Óli Stefán Flóventsson, þjálfari KA, eftir 1-1 jafntefli gegn ÍBV í Pepsi Max-deildinni í dag.
Lestu um leikinn: ÍBV 1 - 1 KA
Halldór Páll í marki ÍBV varði vítaspyrnu frá Hallgrími Mar Steingrímssyni á síðustu stundu í uppbótartíma seinni hálfleiks. Hann hljóp inn í klefa eftir leikinn og brotnaði niður að eigin sögn.
„Hann vill það besta fyrir liðið sitt. Hann tekur þessa ábyrgð að fara á vítapunktinn. Menn geta klikkað. Við stöndum í þessum saman, hann er ekki í þessu einn. Hann hefur staðið sig frábærlega í sumar og skilað fullt af stigum. Núna erum við til staðar fyrir hann," sagði Óli.
Þetta var fyrsta stig ÍBV síðan 2. júní, en liðið er á botninum með aðeins sex stig.
„Menn verða að sýna ÍBV virðingu, þetta er ÍBV. Þeir eru á sínum heimavelli þar sem þeir hafa alltaf verið sterkir. Þeir hafa verið að tapa mörgum af þessum leikjum í hörkuleikjum. Við skulum ekki vera með neinn dónaskap við þá. Við komum inn í þennan leik af virðingu og tökum með okkur stigið."
KA er í níunda sæti með 20 stig. Liðið er enn í harðri fallbaráttu.
„Þetta er staðan. Við tókum eitt stig og prílum einu stigi nær okkar takmarki sem er að halda okkur í þessari deild, fyrst og fremst. Það var margt jákvætt í okkar leik og við verðum að taka það með okkur."
VIðtalið er hér að ofan.
Athugasemdir