Zlatan gekk til liðs við Galaxy fyrir síðasta tímabil og gerði þá 22 mörk yfir allt tímabilið en hann er nú þegar kominn með 20 mörk á þessu tímabili.

Hann gerði bæði mörk liðsins í 2-2 jafntefli gegn Seattle Sounders í nótt en fyrra markið gerði hann undir lok fyrri hálfleiks með góðum skalla er hann jafnaði stöðuna, 1-1. Þá kom hann liðinu yfir með marki úr vítaspyrnu í þeim síðari.

Jorgen Skelvijk varð fyrir því óláni að koma knettinum svo í eigið net undir lok leiks og lokatölur því 2-2. Galaxy er í fínum málum fyrir úrslitakeppnina en liðið er í 3. sæti vesturdeildarinnar með 41 stig, stigi á eftir Minnesota United en heilum 17 stigum á eftir toppliði Los Angeles FC.

Úrslitakeppnin hefst í október en sjö lið fara úr vesturdeildinni og þá fara einnig sjö lið úr austurdeildinni. Galaxy rétt missti af sæti í úrslitakeppninni á síðustu leiktíð en það munaði aðeins stigi á þeim og Real Salt Lake City.