Diogo Jota skoraði fyrsta mark leiksins strax á fjórðu mínútu þegar að hann fékk geggjaða sendingu frá Joao Moutinho. Sendingin vel tímasett og hlaupið hjá Jota innfyrir vörn Leicester frábært.

Wolves tvöfaldaði forystu sína einungis átta mínútum síðar Moutinho tók hornspyrnu sem að endaði beint á kollinum á Ryan Bennett sem að skallaði boltann í netið. Fleiri mörk voru ekki skoruð í fyrri hálfleik og heimamenn leiddu því 2-0 í hálfleik.

Leicester byrjaði síðari hálfleikinn mun betur og Demarai Gray minnkaði muninn eftir hraða skyndisókn. Harvey Barnes jafnaði síðan metin fimm mínútum síðar en boltinn fór í netið með viðkomu í Conor Coady.

Diogo Jota var aftur á ferðinni á 64. mínútu þegar að hann kom Wolves yfir á nýjan leik.

Liðsmenn Leicester voru ekki hættir en á 87. mínútu jafnaði Morgan fyrir gestina eftir frábæra sendingu frá James Maddison. Allt leit út fyrir það að niðurstaðan yrði jafntefli.

Diogo Jota tók það ekki í mál og skoraði sigurmark heimamanna í uppbótartíma eftir sendingu frá Raul Jimenez. Algjörlega magnaður Jota með þrennu í dag.

Nuno Santo, þjálfari Wolves var síðan rekinn útaf eftir sigurmarkið en hann hljóp inn á völlinn til þess að fagna með sínum mönnum.

Algjörlega magnaður leikur sem að aðdáendur enska boltans fengu í hádeginu!