Paris Saint-Germain lék á als oddi í frönsku úrvalsdeildinni í kvöld er liðið fékk Guingamp í heimsókn. Neymar, Cavani, Mbappe og félagar gerðu sér lítið fyrir og skoruðu níu mörk.
Neymar skoraði fyrsta markið á 11. mínútu og bætti Mbappe við tveimur fyrir leikhlé. Staðan var 3-0 í hálfleik.
Edinson Cavani skoraði fyrstu tvö mörk síðari hálfleiks og hann fullkomnaði þrennu sína eftir að Neymar hafði skorað sitt annað mark.
Mbappe fylgdi í fótspor Cavani og fullkomnaði þrennu sína á 80. mínútu og á 83. mínútu skoraði Thomas Meunier síðasta mark leiksins.
PSG fór í æfingaferð til Katar í vikunni og svaraði Kylian Mbappe þar meðal annars spurningu Fótbolta.net um Ísland.
PSG er á toppnum í Frakklandi með 13 stiga forskot, en þar að auki á liðið tvo leiki til góða á liðið í öðru sæti, Lille.
Mónakó í miklu veseni
Thierry Henry og lærisveinar hans í Mónakó voru einnig í eldlínunni í kvöld, en tímabilið hefur hingað til verið hörmulegt hjá Mónakó. Liðið er í fallbaráttu.
Í kvöld steinlá liðið fyrir Strasbourg á heimavelli. Lokatölur urðu 5-1 fyrir Strasbourg. Cesc Fabregas lék allan leikinn á miðjunni hjá Mónakó í kvöld.
Mónakó er í næst neðsta sæti deildarinnar með 15 stig, aðeins einu stigi meira en Guingamp sem tapaði 9-0 gegn PSG í kvöld.
Athugasemdir