Valur vann Leikni, 3-0, í B-riðli Reykjavíkurmótsins á Origo-vellinum í kvöld. Guðmundur Andri Tryggvason skoraði tvö fyrir heimamenn og hjálpaði liðinu að ná í fyrsta sigurinn á mótinu.

Fyrsta mark Guðmundar kom á 3. mínútu áður en Þorsteinn Emil Jónsson bætti við öðru á 23. mínútu.

Þorsteinn kom til Vals frá Breiðabliki undir lok síðasta árs en hann spilaði 16 leiki með Augnablik á síðasta tímabili. Þorsteinn er fæddur árið 2004.

Guðmundur Andri gerði síðan út um leikinn sjö mínútum síðar og fyrsti sigur Vals í höfn.

Valsmenn eru með þrjú stig í öðru sæti riðilsins en liðið mun mæta Fram í lokaleiknum og þarf Valur að vinna með þriggja marka mun til að komast í úrslitaleik mótsins.