Markvörðurinn efnilegi Jökull Andrésson opnaði sig nýverið um kvíða sem hann hefur glímt við á lífsleiðinni.
Hinn 19 ára gamli Jökull kom með góð skilaboð í tilefni af 'Time to Talk' dagsins á Englandi en hann er haldinn til að hvetja fólk til að opna sig um andleg vandamál.
Jökull var í viðtali við Fótbolta.net þar sem hann var meðal annars spurður út í það hvernig áhrif kvíði hefur haft á hann.
„Kvíðinn hefur haft rosaleg áhrif á mig. Þegar ég var í 5. og 6. flokki sagði ég oft við mömmu að ég gæti ekki farið að keppa. Ég var með svo slæman kvíða á tímabili," segir Jökull.
„Hann kom líka mikið fyrsta árið í Reading. Ég kom hérna og var í breskum strákaskóla. Ég var alltaf í skólabúning og þetta var rosalega erfitt ár."
„Ástæðan fyrir því að ég var opna mig var sú að þegar ég var upp á mínu versta þá var ég duglegur að tala við sálfræðing. Ég talaði við sálfræðing í heilt ár einu sinni í viku. Sálfræðingurinn, hún hjálpaði mér svo rosalega mikið. Ekki að komast yfir kvíðann heldur hvernig ég á að takast við kvíðann á hverjum einasta degi. Ef það væri ekki fyrir hana þá væri ég ekki á þeim stað sem ég er í dag. Ég ráðlegg fólki að opna sig og tala um þetta, kvíðinn getur haldið manni svo niðri."
Athugasemdir