Nýjustu fregnir frá Ítalíu eru þær að Inter og Manchester City eru í viðræðum um félagsskipti Danilo.
Danilo er 27 ára hægri bakvörður sem Pep Guardiola keypti til Man City sumarið 2017. Brasilíski landsliðsmaðurinn, sem á 23 A-landsleiki að baki, kostaði tæplega 30 milljónir punda en hefur aðeins leikið 32 deildarleiki fyrir félagið og er oft spilað úr stöðu.
Í heildina á hann 56 keppnisleiki að baki fyrir City en félagið spilar fleiri leiki á hverju tímabili en flest önnur evrópsk félög.
Danilo gerði góða hluti með Atletico Mineiro og Santos í brasilíska boltanum áður en hann var fenginn til Porto. Þar hélt hann áfram að hrífa og var keyptur til Real Madrid. Hjá Real náði hann ekki að festa sig í sessi í byrjunarliðinu og fékk svipaðan spiltíma og hann fær nú.
Inter er í þriðja sæti ítölsku deildarinnar og er svo gott sem búið að tryggja sér sæti í riðlakeppni Meistaradeildarinnar. Félagið hefur verið í vandræðum með bakvarðarstöðuna hægra megin á tímabilinu en Joao Cancelo, sem er nú leikmaður Juventus, gerði frábæra hluti þar á síðasta tímabili.
Inter er með þokkalegan leikmannahóp en komst ekki upp úr erfiðum Meistaradeildarriðli þrátt fyrir sigra gegn Tottenham og PSV Eindhoven og jafntefli á heimavelli gegn Barcelona. Líklegt er að nokkrir af þekktari leikmönnum félagsins verið seldir í sumar, Mauro Icardi og Ivan Perisic eru sérstaklega orðaðir við brottför.
Athugasemdir