Jurgen Klopp, stjóri Liverpool, vinnur með leikmannahóp sínum heiman frá vegna kórónuveirufaraldursins. Ekkert er spilað í ensku úrvalsdeildinni vegna veirunnar, en Liverpool er á toppi deildarinnar með 25 stiga forskot.
Klopp hefur meiri frítíma en áður þar sem hann er ekki að undirbúa leiki. Hann er þess vegna búinn að taka upp nokkur áhugamál.
Í viðtali við heimasíðu Liverpool deildi Klopp því hvernig líf hans væri í útgöngubanninu á Bretlandi. Hann segist hafa horft á Taken þríleikinn en ekki þáttarröðina sem allir eru að tala um: Tiger King. Þá hefur hann horft á gamla leiki Liverpool og hvatt leikmenn Liverpool til að gera það sama.
Þá er Klopp kominn með nýtt starf á heimilinu, hann sér um uppvaskið. Markmið hans á næstunni er svo að læra að gera bindishnút.
Athugasemdir