„Heilsan er mjög góð. Auðvitað er smá þreyta í mannskapnum en þetta er snöggt að koma aftur," sagði vinstri bakvörður okkar Íslendinga, Hörður Björgvin Magnússon fyrir æfingu landsliðsins í Gelendzhik í morgun.
Eftir góða hvíld frá því í leiknum gegn Argentínu æfir liðið saman í dag áður en það ferðast til Volgograd seinni partinn á morgun.
Eftir góða hvíld frá því í leiknum gegn Argentínu æfir liðið saman í dag áður en það ferðast til Volgograd seinni partinn á morgun.
Í gær fengu landsliðs strákarnir óvænta heimsókn frá Mið-Íslandi í boði Vodafone.
„Þeir komu okkur á óvart. Við fengum smá leikrit frá Víði (Reynisson, öryggisstjóri landsliðins) og hann gerði það vel. Hann tók sólarkrem og bar á sig í klukkutíma og var að sýna okkur hvernig við ættum að gera það. Síðan kom Mið-Ísland inn í herbergið og þá kom skemmtun í liðið og auðvitað gaman að hlæja með þeim."
Íslenska liðið mætir Nígeríu í Volgograd á föstudaginn. Hörður býst við erfiðum leik.
„Það verður góður hiti og þessar flugur... við sáum leikinn í gær og það voru flugur útum allt. Spurning hvort maður þurfi að kaupa þetta flugnanet fyrir leikinn. Þetta verður mjög erfiður leikur en skemmtilegt," sagði Hörður en þar á hann við leik Englands og Túnis sem fór fram á sama velli í Volgograd.
Mikill hiti er í kortunum fyrir leikinn á föstudaginn. Hörður segist ekki hafa áhyggjur að Nígeríumenn hafi forskot hvað það varðar.
„Nei, ég get ekki sagt það. Við erum orðnir vanir þessum hita núna og erum tilbúnir í hvað sem er. Við munum gefa þeim góðan leik," sagði Hörður sem segist ekki eiga neinn vin í nígeríska landsliðinu, ennþá.
„En maður mun þekkja einhvern í framtíðinni," sagði Hörður og glotti. Hann segir það augljóst að Ísland stefni á sigur á föstudaginn.
„Auðvitað viljum við fá okkar fyrsta sigur á Heimsmeistaramóti, við náðum því ekki á móti Argentínu en náðum góðu stigi þar en auðvitað viljum við fá meira og þessi leikur er rosalega mikilvægur til að ná þremur stigum og komast í góða stöðu."
Viðtalið við Hörð má sjá í sjónvarpinu hér að ofan.
Athugasemdir