Brasilía náði ekki að vinna varnarsinnað lið Venesúela í A-riðli Copa America í nótt. Markalaust jafntefli varð niðurstaðan þó gestgjafarnir náðu þrívegis að koma knettinum í netið.

VAR myndbandsdómgæslukerfið var í algjöru aðalhlutverki í leiknum en mörk voru tekin af Roberto Firmino, Gabriel Jesus og Philippe Coutinho því að nota VAR.

VAR hefur verið mjög áberandi í Copa America en gagnrýnt hefur verið hvað notkunin á kerfinu hefur tekið gríðarlega langan tíma hjá dómurunum. Níu mínútum var bætt við seinni hálfleikinn í leiknum vegna VAR.

Baulað var á brasilíska liðið þegar flautað var til leiksloka. Þó að liðið hafi einokað knöttinn í leiknum enduðu leikar 0-0.

Áður hafði Perú unnið Bólivíu í sama riðli, eftir að hafa lent undir í leiknum.

Brasilía mun mæta Perú í lokaumferð A-riðils á laugardagskvöld en bæði lið hafa 4 stig. Á sama tíma leika Venesúela (2 stig) og Bólivía (0 stig).