„Markið sem við skorum breytir þessu," sagði Rúnar Kristinsson, þjálfari KR, eftir 3-2 sigur á Val í Pepsi Max-deildinni á þessu miðvikudagskvöldi.
Lestu um leikinn: KR 3 - 2 Valur
KR-ingar lentu 2-0 undir en komu til baka og unnu 3-2. Með sigrinum komust þeir aftur á topp deildarinnar.
„Þegar við minnkum muninn í 2-1 þá fengu menn þessa trú og þá losnaði þessi skjálfti sem mér fannst vera í liðinu allan fyrri hálfleikinn. Það losnar um alla og við spilum eins og við viljum að við spilum."
„Karakterinn, viljinn og krafturinn sem liðið sýnir var frábær."
„Ef að þetta hefði verið öfugt þá hefði þetta örugglega gerst við okkur líka. Það gerist við flest lið þegar þú ert að reyna að verja 2-0 forystu og færð á þig mark í andlitið þá ferðu enn meira að reyna að verja 2-1 og leggst aftar ósjálfrátt. Við hefðum lent í því sama. Þú sérð þegar staðan er orðin 3-2 þá leggjumst við til baka og þeir æða fram með allt. Svona er fótboltinn og svona er hann skemmtilegur," sagði Rúnar.
„Það er mikið eftir af mótinu. Fyrir okkur skiptir miklu máli að við vinnum okkar leiki. Valsmenn hafa átt erfitt uppdráttar í sumar. Þeir eru með frábært lið. Munurinn á þessum tveimur liðum er ekkert mikill. Valur á eftir að koma sér upp töfluna."
„Við viljum sjá til þess að við hlaupum í 95 mínútur, ekki bara 90. Við klúðruðum einum leik fyrr í sumar gegn Fylki þegar við fáum á okkur mark á lokamínútuunum og förum svo til Grindavíkur og töpum þar. Við lærum af þessum mistökum. Íslandsmótið er það sterkt að við getum ekki slakað á í einum einasta leik. Við erum að lyfta okkur upp töfluna af því við erum að hlaupa í 95 mínútur."
Athugasemdir