- Grótta vann Fjölni í Lengjudeild kvenna í kvöld.
Tinna Jónsdóttir, fyrirliði Gróttu
„Ótrúlega ánægð með liðið og stelpurnar. Við þurftum að vera mjög þolinmóðar í dag og vinna mikið fyrir þessu og það bara hafðist að lokum. Ég er gríðarlega stolt.“ Segir Tinna Jónsdóttir, fyrirliði Gróttu eftir 1-0 sigur á Fjölni í Lengjudeildinni í kvöld.
Lestu um leikinn: Grótta 1 - 0 Fjölnir
„Við ætluðum að halda boltanum og stjórna leiknum og skapa okkur færi sem gekk ekki kanski alveg nógu vel í fyrri hálfleik. Við komum aðeins mótiveraðari út í seinni hálfleik og skorum mark sem var dæmt af og við bara gáfumst ekki upp og uppskárum 1-0 sigur.“
Leikurinn var frekar tíðindalaus í fyrri hálfleik en var þó mun líflengri undir lok leiksins.
„Við ætluðum að vera grimmari á seinni boltann. Mér fannst það aðeins vanta í fyrri hálfleik og ég held að það hafi bara heppnast mjög vel. Síðan bara halda áfram að vera þolinmóðar, við vissum það að við myndum skora ef að við myndum gera það.“
Grótta krækti í sín fyrstu stig í Lengjudeild kvenna í kvöld, en liðið eru nýliðar í deildinni eftir að hafa tryggt sér upp í fyrra. Þeim er þó ekki spáð falli og segir Tinna að það eru háleit markmið innan hópsins.
„Já við erum nýliðar í deildinni og hérna það er engin pressa út á við en við erum með háleit markmið innan hópsins, þannig við ætlum bara að koma að krafti inn í deildina og vera með.“
Viðtalið í heild sinni má nálgast í spilaranum að ofan.
Athugasemdir
