„Við erum auðvitað svekkt, en mér fannst við vera mjög skipulagðar í fyrri hálfleik og sköpuðum tvö eða þrjú mjög góð tækifæri og gáfum þeim mjög fá tækifæri á okkur," sagði Jonathan Glenn, þjálfari ÍBV, eftir 4-0 tap gegn Stjörnunni í dag.
„Fyrir utan langskotið sem þær skoruðu úr í lok hálfleiksins, sem ég held að hafi verið smá hnífur fyrir okkur, stelpunun leið þannig í hálfleik. En í seinni hálfleiknum reyndum við að mæta þeim svolítið hærra á vellinum en auðvitað er Stjarnan með gæðaleikmenn sem skoruðu þrjú góð mörk."
Lestu um leikinn: Stjarnan 4 - 0 ÍBV
Stjarnan skoraði tvö mörk með stuttu millibili í byrjun seinni hálfleiks. Glenn er ekki viss hvað fór úrskeiðis hjá sínum stelpum.
„Ég er ekki viss, mér fannst við vera svolítið óskipulagðar og það var ekki nógu mikil pressa á boltann. En ég held líka að leikjaálagið og þreytan hafi virkilega haft áhrif. Ég sá það frá síðasta leik og inn í þennan leik að stelpurnar eru mjög þreyttar, við erum að fást við meiðsli og leikbann þannig við vorum með fámennan hóp, 4-5 leikmenn á bekknum þannig þetta er búið að vera erfitt og við erum ánægð að fá pásu núna."
Glenn segist vera ánægður með stigasöfnunina í fyrra hluta mótsins.
„Já klárlega, það er það sem ég sagði stelpunum eftir leikinn. Við tökum það jákvæða með okkur og stelpurnar eru búnar að vera frábærar og við tökum það með okkur inn í pásuna og hlökkum til seinni helming mótsins," sagði Glenn.
Viðtalið í heild má sjá í spilaranum hér fyrir ofan, þar talar Glenn meðal annars um hvernig ÍBV liðið ætlar að nýta sér pásuna sem framundan er vegna EM kvenna.