Marcus Rashford er einn þeirra fótboltamanna sem hafa orðið sem mest fyrir barðinu á kynþáttaníði og þá sérstaklega á samfélagsmiðlum.
Hann er duglegur að lögsækja níðinga til að láta þá gjalda fyrir hegðun sína og vonandi læra af henni. Á dögunum var egypskur námsmaður með kynþáttaníð í garð Rashford og ákvað framherjinn að ráða egypskt lögfræðiteymi til að lögsækja manninn unga.
Rashford hefur ráðið tíu lögfræðinga í málið og heimtar 15 þúsund pund, eða 2,4 milljónir íslenskra króna, í skaðabætur.
Rashford hefur oft sagst vera orðinn þreyttur á kynþáttafordómum í fótboltaheiminum og ætlar að gera allt í sínu valdi til að berjast gegn þeim. Hann og landsliðsfélagi hans Bukayo Saka hafa lent fyrir miklum fordómum undanfarin misseri en þar áður var Raheem Sterling helsta skotmark rasistanna.