„Við komum slakari út í síðari hálfleikinn en þeir skarpari. Þeir fengu síðan víti dæmt á röngum tíma. Það er ekki að þeir hafi ekki átt að fá víti í þessum leik en þessi víti sem þeir fengu voru ekki víti en þeir áttu að fá víti einhver staðar annars staðar," sagði Kristján Ómar þjálfari Hauka eftir 4-1 tap á móti Þór á Akureyri en Haukar komust yfir í leiknum.
Lestu um leikinn: Þór 4 - 1 Haukar
Þór fékk tvær vítaspyrnur. Ármann Pétur tókst ekki að skora úr fyrri spyrnunni en Alvaro Montejo skoraði örugglega úr víti á 53 mínútu.
„Dómarinn náði að klúðra öllum vítaspyrnu- og ekki vítaspyrnudómum í þessum leik en það var á báða bóga. Þannig komust þeir inn í leikinn og stíga á bensíngjöfina á meðan við slökum meira á. Svo gerum við hraustlega upp á bakið í föstum leikatriðum."
Haukar leiddu 0-1 eftir fyrri hálfleikinn.
„Við þurftum að gera ýmsar breytingar á liðinu, veikindum, meiðslum og einhverju brasi þannig við vorum sáttir við fyrri hálfleikinn. Tempóið hélst þolanlega lágt og menn komust inn í hlutverk og stöður sem var bara flott. Svo snérist þetta bara við í seinni og þeir stíga á bensíngjöfina."
Haukar hafa fengið 28 mörk á sig í 12 leikjum.
„Áhyggjuefni er ekki rétta orðið, þetta svíður inn að beinmerg hjá mér sem varnarmanni í mínu eðli. Við erum bara á þeim stað að margir í mínu liði eru bara verulega óþroskaðir í ýmsum stöðum leiksins sem koma upp jafnt og þétt, föst leikatriði og annað slíkt. Þess vegna fáum við á okkur mörg mörk sérstaklega á móti ágætis liðum."
Viðtalið má sjá í heild í sjónvarpinu hér að ofan.
Athugasemdir
