Napoli hafði betur gegn Lazio í síðasta leik kvöldsins í ítalska boltanum.

Arkadiusz Milik átti tvö skot í stöngina áður en Jose Callejon kom sprækum heimamönnum yfir eftir 34 mínútur. Milik tvöfaldaði forystuna með glæsilegu marki beint úr aukaspyrnu þremur mínútum síðar.

Gestirnir mættu grimmir til leiks í upphafi síðari hálfleiks og minnkaði Ciro Immobile muninn þegar 25 mínútur voru eftir af venjulegum leiktíma.

Francesco Acerbi, varnarmaður Lazio, fékk að líta sitt annað gula spjald skömmu síðar. Tíu leikmönnum Lazio tókst ekki að jafna og er Napoli sex stigum eftir toppliði Juventus sem á leik til góða gegn botnliði Chievo á morgun.

Lazio er í fimmta sæti eftir tapið, einu stigi eftir erkifjendunum í Roma sem sitja í Meistaradeildarsæti.