Bamford skoraði fyrsta mark leiksins og lagði svo upp sigurmarkið fyrir Raphinha.

„Þetta var erfiður leikur fyrir mig, þetta var alltaf spurning um hversu margar mínútur ég gat höndlað. Ég gat ekki hlaupið mikið og verð að hrósa liðsfélögunum fyrir að bæta upp fyrir það," sagði Bamford kátur með sigurinn. Enski sóknarmaðurinn var svo spurður út í landsliðið en hann var ekki valinn í landsliðshóp Gareth Southgate þrátt fyrir að vera að gera frábæra hluti í úrvalsdeildinni.

„Allir leikmenn landsliðsins eiga skilið að vera þar og auðvitað er sárt að vera skilinn eftir heima. Eina sem maður getur gert er að leggja enn harðar að sér og reyna að komast í næsta landsliðshóp. Ef ég held áfram að skora eins og ég hef verið að gera þá býst ég við að geta barist um sæti í landsliðshópnum. Ég hefði aldrei trúað því í byrjun tímabils að ég yrði orðaður við landsliðið."