Crotone tók á móti Bologna í fyrsta leik dagsins í ítalska boltanum og var Andri Fannar Baldursson á varamannabekknum hjá Bologna.

Fyrri hálfleikurinn var opinn og fjörugur en það voru heimamenn sem nýttu færin sín og leiddu 2-0 í leikhlé. Junior Messias skoraði á 32. mínútu og svo tvöfaldaði Simy forystuna úr vítaspyrnu.

Andreas Skov Olsen og Jerdy Schouten komu inn í leikhlé og við það breyttist leikurinn. Adama Soumaoro minnkaði muninn og svo jafnaði Schouten með glæsilegu skoti á 70. mínútu.

Andreas Skov Olsen gerði svo sigurmark Bologna á lokakaflanum og tryggði liðinu þannig frábæran endurkomusigur á botnliðinu.

Bologna er um miðja deild með 34 stig eftir 28 umferðir. Crotone er með 15 stig, átta stigum frá öruggu sæti.