Guðlaugur Victor Pálsson lék lykilhlutverk í hörkuslag er Darmstadt heimsótti Braunschweig í þýsku B-deildinni í dag.

Guðlaugur Victor skoraði fyrsta mark leiksins á 13. mínútu með frábæru skoti úr góðu færi sem fór í slána og inn.

Fjórum mínútum síðar voru heimamenn í Braunschweig búnir að jafna úr vítaspyrnu og skömmu eftir það fengu þeir aðra vítaspyrnu eftir að boltinn fór í hendi Guðlaugs Victors innan vítateigs.

Markvörður Darmstadt gerði þó vel og varði vítaspyrnuna.

Leikurinn var áfram jafn og skemmtilegur en hvorugu liði tókst að skora og niðurstaðan 1-1 jafntefli.

Darmstadt siglir nokkuð lygnan sjó níu stigum frá fallsvæðinu þegar átta umferðir eru eftir.