Hannes varði vítaspyrnu Lionel Messi á laugardaginn.
Arnar Björnsson, íþróttafréttamaður á Stöð 2, spurði Hannes Þór Halldórsson á fréttamannafundi í dag hvort að frammistaða hans gegn Argentínu hafi gefið aukið sjálfstraust eða hvort þetta hafi verið eins og venjulegur dagur í vinnunni.
„Ég held að þetta hafi verið allt annað en venjulegur dagur í vinnunni," sagði Hannes léttur.
„Þetta var auðvitað ótrúleg upplifun. Þetta var fyrsti leikur Íslands á Heimsmeistaramóti og það er eitthvað sem allir í hópnum eru stoltir að taka þátt í."
„Þetta voru stór augnablik og eitthvað sem við munum aldrei gleyma. Núna snýst þetta um að leggja þetta aðeins til hliðar."
„Við eigum eftir að heyra nóg um þetta síðar þegar við komum heim. Núna þurfum við að fókusa á næsta leik," sagði Hannes en íslenska landsliðið ferðast í dag til Volgograd þar sem það mætir Nígeríu á föstudaginn.
Athugasemdir
