Origi verður sennilega ekki seldur í sumar.
Belgíski framherjinn, Divock Origi leikmaður Liverpool verður ekki seldur frá félaginu í sumar þrátt fyrir að renna út af samningi við félagið næsta sumar. Það er ESPN sem greinir frá þessu.
Enska félagið sem varð Evrópumeistari eftir sigur á Tottenham í úrslitaleik Meistaradeildarinnar hefur boðið framherjanum nýjan samning en Origi hefur ekki ennþá skrifað undir nýjan samning.
Origi skoraði þrjú mörk í Meistaradeildinni í vetur, tvö gegn Barcelona í undanúrslitum og eitt í úrslitaleik sjálfum gegn Tottenham.
Origi gekk til liðs við Liverpool frá franska félaginu Lille sumarið 2014 var lánaður aftur til Lille tímabilið 2014-2015. Tímabilið 2017-2018 var hann síðan lánaður til Wolfsburg í Þýskalandi.
Hann á að baki 63 leiki fyrir Liverpool í öllum keppnum þar sem hann hefur skorað 15 mörk.
Athugasemdir
