Tveir leikir fóru í dag fram í ítölsku Serie A. Fyrri leiknum lauk með 1-1 jafntefli þegar Parma heimsótti Torino. Andrea Belotti brást bogalistin á vítapunktinum fyrir Torino í upphafi seinni hálfleiks, svekkjandi fyrir heimamenn.

Nicolas N'Koulou skoraði mark heimamanna eftir undirbúning Alejandro Berenguer. Gervinho lagði svo upp jöfnunarmarkið fyrir Juraj Kucka eftir ríflega hálftíma. Parma er þremur stigum frá Evrópudeildarsæti og Torino er þremur stigum fyrir ofan fallsæti.

Það var svo fjör þegar Cagliari sótti Verona heim í seinni leik dagsins. Heimamenn komust í 2-0 á 26. mínútu. Samuel Di Carmine skoraði bæði mörk þeirra. Á 35. mínútu fékk Fabio Borini, fyrrum leikmaður Liverpool, rauða spjaldið fyrir að lenda með takkana í leikmanni Cagliari þegar hann var að hreinsa boltanum fram völlinn. Gio Simeone minnkaði muninn fyrir hlé en nær komust gestirnir ekki.

Luca Cigarini fékk að líta sitt annað gula spjald hjá gestunum á 70. mínútu og því enduðu bæði lið með tíu leikmenn inná. Cagliari er í 12. sæti og Verona er í 7. sæti, stigi á eftir Napoli.