Ingunn Haraldsdóttir, fyrirliði KR
„Eftir á að hyggja virðum við stigið en fyrir leik ætluðum við okkur auðvitað þrjú stig. Þetta er svekkjandi,” sagði Ingunn Haraldsdóttir, fyrirliði KR, eftir 1-1 jafnteflisleik gegn Þrótti fyrr í kvöld.
Lestu um leikinn: KR 1 - 1 Þróttur R.
„Við vorum þéttar varnarlega og gáfum ekki mörg færi á okkur,“ sagði Ingunn um leikinn en bætti við að liðið hefði mátt spila á hærra tempói og að fín færi hefðu farið forgörðum. Hún er hinsvegar ánægð með það að KR-liðið hefur enn ekki tapað leik eftir að hafa komið úr sóttkví.
„Við tökum því og höldum áfram að vera taplausar,“ sagði Ingunn og bætti við að KR liðið hefði nýtt tímann í sóttkvínni vel. Þá hrósaði hún nýjum leikmanni KR, Angelu R. Beard fyrir hennar frammistöðu í sínum fyrsta leik fyrir félagið.
„Hún kemur mjög vel inn í þetta. Hún tók eina æfingu með okkur fyrir þennan leik. Þetta er hörkuleikmaður og ég hlakka til að sjá meira af henni.“
Nánar er rætt við Ingunni í spilaranum hér að ofan.
Athugasemdir
