Elías Már spilaði sinn fyrsta leik í Kína
Elías Már Ómarsson lék sinn fyrsta leik með kínverska úrvalsdeildarliðinu Meizhou Hakka í 1-1 jafntefli gegn Henan í gær.
Keflvíkingurinn samdi við Meizhou Hakka fyrir nokkrum dögum og var kastað strax í hópinn.
Hann kom inn af bekknum í hálfleik og hjálpaði liðinu að kreista fram stig. Darick Morris skoraði jöfnunarmarkið þegar lítið var eftir af leiknum og er Meizhou nú með 13 stig í 14. sæti.
Elías varð þar með fjórði Íslendingurinn til að spila í kínversku deildinni á eftir Viðari Erni Kjartanssyni, Sölva Geir Ottesen og Eið Smára Guðjohnsen.
Róbert Frosti Þorkelsson lék sinn fyrsta deildarleik með sænska liðinu GAIS er það vann Degerfors, 3-0, á útivelli.
Stjörnumaðurinn gekk í raðir GAIS fyrir tímabilið og hafði komið við sögu í bikarnum áður en hann meiddist. Hann er kominn aftur af stað og spilaði síðustu mínúturnar í sigrinum í gær. GAIS er í 6. sæti með 28 stig.
Kolbeinn Þórðarson átti stóran þátt í 1-0 sigri Gautaborgar á Sirius í dag.
Blikinn tók hornspyrnu á 59. mínútu sem datt af varnarmanni og til David Kruse sem hamraði boltanum í netið.
Það reyndist eina mark leiksins en Gautaborg er nú með 25 stig í 7. sæti deildarinnar.
Athugasemdir
