Suso var lánaður til Sevilla í janúar og er möguleiki fyrir spænska félagið að kaupa hann.

Suso, sem lék með Liverpool fyrr á ferlinum, segir að það sé ekki hægt að byggja neitt upp hjá Milan. „Það er ekki hægt að byggja upp neitt stöðugt þegar allt breytist á hverju ári. Í minni tíð hjá félaginu hafa verið þrír forsetar, fjölmargir þjálfarar og liðsfélagar."

„Ég vonast til að spila með Sevilla í Meistaradeildinni og vinna eitthvað. Ég gæti verið hér áfram og ég vona að það gerist," sagði hinn 26 ára gamli Suso við AS.

Lánssamningurinn gildir í 18 mánuði en talið er að Sevilla verði skyldugt að kaupa fjölhæfa miðjumanninn fyrir 22 milljónir evra ef liðið kemst í Meistaradeildina.