Hamar vann öruggan sigur á KM í 2. deild kvenna í kvöld en leikið var á Grýluvelli í Hveragerði.

Staðan var 1-0 í hálfleik eftir mark frá Írisi Sverrisdóttur en Hamar blés til sóknar í seinni hálfleik.

Íris gerði annað mark sitt eftir rúmlega klukkutíma leik og svo bætti fyrirliði Hamars, Dagný Rún Gísladóttir, við þremur mörkum með stuttu millibili.

Brynhildur Sif Viktorsdóttir gerði svo sjötta og síðasta markið áður en flautað var til leiksloka. Lokatölur 6-0 fyrir Hamar sem tapaði 7-0 fyrir KH í fyrsta leik. KM, sem var að spila sinn annan leik í Íslandsmóti í kvöld, er án stiga.