Íslenska kvennalandsliðið hefur sjaldan verið á betri stað á heimslista FIFA heldur en staðan er í dag fyrir lokakeppni Evrópumótsins.
Stelpurnar okkar fara á lokamót EM sem verður haldið á Englandi í sumar og eru þar með Frakklandi, Ítalíu og Belgíu í riðli.
Það er óhætt að segja að stelpunum gangi betur heldur en strákunum sem eru í mikilli lægð og hafa verið að hrynja niður heimslistann undanfarin misseri.
Kvennalandsliðið er í 17. sæti heimslistans en hefur aldrei komist uppfyrir 15. sæti listans.
Íslenski riðillinn ætti að vera jafn þar sem Ítalía er í 14. sæti og Belgía í því 19. á heimslistanum.
Bandaríkin eiga besta kvennalandslið í heimi samkvæmt FIFA, Svíþjóð er með næstbesta og Frakkland þriðja.
Metfjöldi landsliða er á listanum að sinni þar sem 181 þjóðir eru skráðar til leiks.
Evrópumótið hefst 6. júlí og verður næsti listi gefinn út 5. ágúst, viku eftir úrslitaleikinn.
