Troy Deeney, framherji Watford á Englandi, þvertekur fyrir það að leikmenn hafi slegist inn í klefa í hálfleik gegn West Ham, leik sem liðið tapaði 3-1.
Nigel Pearson var rekinn úr starfi sínu sem knattspyrnustjóri Watford á dögunum eftir tapið gegn West Ham en liðið er í fallbaráttu þegar tveir leikir eru eftir.
Hayden Mullins stýrir liðinu út leiktíðina en það hafa margar áhugaverðar sögur verið sagðar á samfélagsmiðlum varðandi West Ham leikinn og uppstillingu á liðinu.
Þar kom fram að leikmenn hafi slegist inn í klefa í hálfleik gegn West Ham og að Deeney muni koma að liðsvalinu í síðustu tveimur leikjunum. Hann vísar þessu til föðurhúsanna.
„Ég vil bara koma nokkrum hlutum á framfæri. Það var enginn slagur í hálfleik. Árið er 2020 og þetta er eitthvað sem er ekki gert lengur og sérstaklega með allar þessar myndavélar út um allt," sagði Deeney.
„Stjórinn lagði ekki hendur á menn. Hann var mjög pirraður og ræddi við okkur en það var enginn að slást. Það var enginn kýldur eða kitlaður. Hnefarnir voru ekki á lofti."
„Í öðru lagi þá mun ég ekki velja liðið. Ég hef lesið það á netinu að ég verði spilandi þjálfari. Er eitthvað annað sem ég hef misst af?" sagði hann og spurði.
Athugasemdir