Tveir leikir fóru fram í ítölsku Serie A í kvöld. Atalanta vann sigur á Bologna í fyrri leik kvöldsins.

Staðan var markalaus á heimavelli Atalanta í hálfleik þegar varamaðurinn Luis Muriel kom inn á. Hann skoraði svo sigurmark leiksins á 62. mínútu og er þetta hans sautjánda mark á leiktíðinni og hafði hann einungis leikið 1100 mínútur þegar hann skoraði markið sitt í dag. Fljótt reiknað er það mark á 65 mínútna fresti sem er það langbesta á meðal markaskorara í Evrópu.

Atalanta er nú sex stigum á eftir Juventus sem á leik til góða. Níu stig eru í pottinum fyrir Atalanta. Andri Fannar Baldursson var ónotaður varamaður hjá Bologna.

Á heimavelli Sassuolo mættu AC Milan í heimsókn. Sænski snillingurinn Zlatan Ibrahimovic kom gestunum yfir á 19. mínútu en Francesco Caputo jafnaði metin með marki úr vítaspyrnu rétt fyrir hlé.

Zlatan neitaði því að ganga til búningsherbergja með stöðuna jafna og bætti hann við marki fyrir gestina skömmu áður en hálfleikurinn var úti. Fleiri mörk voru ekki skoruð í leiknum og Milan áfram á góðu skriði.