Tveir leikir fóru fram í Pepsi Max-deild kvenna í kvöld en Breiðablik og Valur sem hafa slegist um toppinn í sumar þurftu að hafa fyrir sigrunum í kvöld.
Breiðablik fór í vesturbæinn og vann þar KR 2-1. Guðmunda Brynja Óladóttir kom KR-ingum yfir á 32. mínútu leiksins en hún lét þá vaða af hægri vængnum og náði Sonný Lára Þráinsdóttir ekki að halda boltanum og staðan óvænt 1-0 fyrir KR.
Staðan var þannig í hálfleik en á 67. mínútu jöfnuðu Blikar en KR-ingar töpuðu boltanum á miðsvæðinu og Blikaliðið fljótt að átta sig en Berglind Björg Þorvalsdóttir fékk boltann og stakk honum á Karólínu Leu Vilhjálmsdóttur sem skoraði örugglega í fjærhornið.
Berglind Björg skoraði svo sigurmarkið tíu mínútum síðar eftir langa fyrirgjöf frá Ástu Eir Árnadóttur. Lokatölur 2-1 fyrir Blikum.
Valur vann þá Selfoss 1-0. Hlín Eiríksdóttir gerði eina markið gegn bikarmeisturunum á 65. mínútu. Hallbera Guðný Gísladóttir átti fyrirgjöf frá vinstri og boltinn datt þar þar í teignum og var Hlín mætt til að taka boltann á lofti og koma honum í netið.
Valur er á toppnum með 40 stig en Breiðablik í 2. sæti með 38 stig.
Úrslit og markaskorarar:
KR 1 - 2 Breiðablik
1-0 Guðmunda Brynja Óladóttir ('32 )
1-1 Karólína Lea Vilhjálmsdóttir ('67 )
1-2 Berglind Björg Þorvaldsdóttir ('77 )
Selfoss 0 - 1 Valur
0-1 Hlín Eiríksdóttir ('65 )
Athugasemdir