„Þetta eru strákar sem eru í kringum tólf ára. Þeir hafa líka ferðast með okkur í útileiki og eiga mikið hrós fyrir það sem þeir hafa gert," sagði Leifur Andri Leifsson, fyrirliði HK, í hlaðvarpsþættinum Miðjunni á Fótbolta.net í vikunni.

„Þeir hafa lagt líf og sál í þetta. Þeir gengu í hús í vetur og söfnuðu dósum til að geta keypt sér trommu og verið með meiri læti. Þeir mynda góða stemningu og þetta hefur klárlega lyft okkur upp. Þeir syngja og tralla allan leikinn. Þeir búa til söngva og þetta gefur okkur auka kraft."

„Þeir horfa á okkur gera góða hluti og vilja spila fyrir félagið í framtíðinni. Það hefur kannski verið vandamál að halda ungum og efnilegum leikmönnum hjá félaginu. HK vill halda þessum efnilegu strákum og vonandi erum við að hjálpa til við það."

Hjörvar Hafliðason markmannsþjálfari HK var ósáttur við mætingu stuðningsmanna liðsins gegn Fram á dögunum og lét í sér heyra í þætti sínum Dr. Football. Brynjar Björn Gunnarsson, þjálfari HK, tekur undir að fleiri stuðningsmenn mættu mæta á leiki liðsins.

„Félagið er ekki búið að vera það lengi upp í Kór að það hafi skapast kjarni í kringum liðið. Það væri skemmtilegt að fá fleiri á völlinn hjá okkur. Þeir sem hafa mætt á völlinn hjá okkur hafa staðið sig frábærlega og við erum frekar þakklátir fyrir það heldur en að kvarta of mikið yfir því að fólk mæti ekki. Með því að fara upp um deild fáum við vonandi fleiri á leiki úr hverfinu," sagði Brynjar Björn í viðtali í Miðjunni.

Sjá einnig:
Miðjan - Brynjar Björn og Leifur ræða um árangur HK