Filipe Luis, vinstri bakvörður Atletico Madrid og brasilíska landsliðsins, gefur lítið fyrir fólk sem segir Lionel Messi ekki hafa verðskuldað að vinna Gullknöttinn í fyrra.
Luka Modric vann Gullknöttinn og batt þannig enda á ótrúlega einokun Messi og Cristiano Ronaldo á verðlaununum undanfarinn áratug. Ronaldo endaði í öðru sæti en Messi náði ekki nema fimmta sæti í kjörinu.
„Ég heyrði að Messi hefði ekki verðskuldað Gullknöttinn því 2018 var slæmt ár fyrir hann. Hann vann spænsku deildina og bikarinn, hann var markahæstur í Evrópu og gaf haug af stoðsendingum," sagði Luis við Globoesporte.
„Ef Messi verðskuldaði ekki Gullknöttinn þá veit ég ekkert um fótbolta. Hann er bestur í Barcelona, ef hann skorar ekki þá á hann stoðsendinguna eða er maðurinn sem byrjar sóknina. Hann er búinn að gera þetta í tíu ár.
„Við erum erkifjendur á vellinum en ég dáist að honum þegar við erum ekki að keppa. Hann er argentínskur, ég er brasilískur. Við eigumst við í spænsku toppbaráttunni og ég veit að ég mun ekki græða neitt á því að tala vel um hann. Ég er bara að vera opinn og heiðarlegur."
Athugasemdir