Ilkay Gundogan, miðjumaður Manchester City, er ekki hrifinn af nýju fyrirkomulagi Meistaradeildarinnar.
Hann telur að umræða um nýtt fyrirkomulag Meistaradeildarinnar hafi gleypst í allri umræðunni um Ofurdeildina síðastliðna viku.
Nýtt fyrirkomulag Meistaradeildar Evrópu var samþykkt í vikunni en það mun taka gildi 2024 og vera til 2033 að minnsta kosti. Nýja fyrirkomulag Meistaradeildarinnar er umdeilt, þátttökuliðum er fjölgað úr 32 í 36 og er riðlakeppnin lögð niður. Hvert lið leikur tíu leikir gegn tíu mismunandi mótherjum.
Liðin raða sér þannig á sérstaka stöðutöflu þar sem efstu átta liðin tryggja sér sæti í útsláttarkeppni. Næstu sextán lið fara í umspil um hin lausu átta sætin.
Það sem er hvað umdeildast við nýja fyrirkomulagið er að tvö af fjórum nýju sætunum í keppninni verður úthlutað miðað við fyrri árangur í keppninni gegnum sérstakan styrkleikalista UEFA. Þar með gæti lið komist í Meistaradeildina þrátt fyrir að enda neðar í deildinni í heimalandinu en eitthvað annað lið sem ekki fær þátttökurétt.
„Getum við líka talað um nýja fyrirkomulagið í Meistaradeildinni?" skrifar Gundogan á Twitter.
„Fleiri og fleiri leikir; er enginn að hugsa um okkur leikmennina? Nýja fyrirkomulagið í Meistaradeildinni er bara það skárra af tveimur illu."
„Fyrirkomulagið sem er núna er frábært og þess vegna er keppnin sú vinsælasta á milli félagsliða í heiminum - hjá leikmönnum og stuðningsmönnum."
Með nýja fyrirkomulaginu verða fleiri leikir hjá liðunum sem komast í keppnina, fleiri stórleikir og meiri peningar.
Hægt er að horfa á myndband hér að neðan frá Tifo Football um nýtt fyrirkomulag keppninnar.
Athugasemdir