FH tapaði sínum fyrsta leik í Pepsi Max-deild karla í dag er liðið spilaði við KR á heimavelli sínum í Kaplakrika.

FH hafði fyrir viðureignina ekki tapað leik og aðeins gert jafntefli við Val í annarri umferð þar sem liðið tapaði stigum.

KR hafði tapað gegn bæði KA og Val hingað til í mótinu en svaraði vel fyrir sig gegn Hafnfirðingum í kvöld.

Fyrra mark leiksins í kvöld skoraði Ægir Jarl Jónasson fyrir KR en það kom eftir hornspyrnu strax á áttundu mínútu leiksins.

Atli Sigurjónsson tók hornspyrnu sem fór beint á kollinn á Ægi sem skallaði knöttinn í netið.

Kjartan Henry Finnbogason féll svo í teignum fyrir KR-inga á 53. mínútu og vítaspyrna dæmd. Pálmi Rafn Pálmason steig á punktinn til að tryggja 2-0 sigur.

FH er í fjórða sæti deildarinnar með 10 stig og situr KR í því sjötta með sjö.