Fyrir nokkrum vikum hefði sigur HK á Skaganum þótt afar ólíklegur en þetta reyndist fjórða tap ÍA í röð eftir ótrúlega byrjun á tímabilinu.

„Það er langt síðan við unnum síðast og því er þetta kærkomið. Við erum búnir að spila ágætlega og höfum mikið verið að missa leiki úr okkar höndum, þannig ég er ánægður með karakterinn og baráttuna sem við sýndum í dag. Við kláruðum leikinn og gáfum þeim aldrei breik," sagði Bjarni að leikslokum.

„Þeir áttu nokkra hættulega bolta inn á teig og eru með hættulegan senter þarna en hann skallaði oft á tíðum bara beint á Arnar eða yfir eða framhjá. Á góðum degi hefði hann alveg getað sett þetta inn.

„Leikplanið var að liggja aðeins til baka, leyfa þeim að vera með boltann og fara afturfyrir þá. Mér fannst það ganga helvíti vel."