Skagamenn fóru gríðarlega vel af stað í sumar og eru áfram í 3. sæti deildarinnar þrátt fyrir slakt gengi.

„Ég er gríðarlega vonsvikinn að hafa tapað hérna. Það var fullt af fólki sem mætti til að styðja við bakið á okkur og við vorum ekki klárir í þetta. Mér fannst HK hafa yfirhöndina í því sem þeir ætluðu að stýra í leiknum," sagði svekktur Jói Kalli að leikslokum.

„Það skiptir ekki máli hvaða leikkerfi þú ert að spila, fyrsta markið hjá HK er alltof auðvelt. Varnarleikurinn var ekki nógu góður. Ég er svekktur yfir því hvað við erum búnir að fá mikið af mörkum á okkur, við höfum verið að byggja okkar leik á ansi grimmum og öflugum varnarleik. Þetta er alltof mikið af mörkum sem við erum að fá á okkur og við vinnum ekki fótboltaleiki ef við verjumst ekki betur en þetta."

Jóhannes segist ekki vera smeykur varðandi framhaldið þrátt fyrir þetta mikla hrun hjá Skagamönnum undanfarnar vikur.

„Það er stutt á milli í þessu. Við sýndum í byrjun tímabils að við getum varist almennilega og við getum skorað mörk. Við höfum ekki náð að stilla okkur nógu vel af í undanförnum leikjum sem er gríðarlega svekkjandi. Það er ekkert panikk, við erum búnir að safna fullt af stigum en við viljum fara að verjast almennilega eins og lið aftur og við viljum fara að vinna leiki aftur.

„Við þurfum að gera mikið betur en þetta."

Þórður Þorsteinn Þórðarson var rekinn af velli undir lok leiksins þegar hann fékk tvö gul spjöld á innan við einni mínútu.

„Það er virkilega svekkjandi að missa mann útaf. Við verðum að sýna aga og halda haus alveg sama hvað gengur á í leikjunum."