Leno fór meiddur af velli í fyrri hálfleik og var sárkvalinn eftir að Maupay hoppaði upp í bolta sem Leno var búinn að grípa. Leno lét Maupay heyra það þegar hann var borinn af velli og eftir leikinn sauð upp úr þegar aðrir leikmenn Arsenal létu franska sóknarmanninn heyra það.

„Sumir leikmanna þeirra þurfa að læra hvað auðmýkt er," sagði Maupay, sem skoraði sigurmarkið í uppbótartímanum.

Draga þurfti Matteo Guendouzi, miðjumann Arsenal og landa Maupay, í burtu eftir leikinn.

„Einn af þeim talaði allan leikinn og sagði mjög ljóta hluti. Þegar ég skoraði þá þurfti ég bara að segja: 'Svona gerist þegar þú segir ljóta hluti á vellinum."

„Ég fór til Arteta og baðst afsökunar. Ég ætlaði aldrei að meiða Leno. Leikmenn Arsenal töluðu mikið og þeir fengu það sem þeir áttu skilið."