Victor Goncharenko, þjálfari CSKA Moskvu, gæti hætt með liðið á næstu dögum en hann þjáist af háþrýstingi. Félagið greinir frá þessu í dag.
Goncharenko gerði frábæra hluti með BATE Borisov í Hvíta-Rússlandi frá 2007 til 2013 áður en hann ákvað að fara til Rússlands. Hann var aðstoðarþjálfari CSKA Moskvu tímabilið 2015-2016 og stýrði þá Ufa eitt tímabil áður en hann tók við CSKA.
Árangur hans í Moskvu hefur verið sæmilegur en nú eru líkur á því að hann hætti með liðið. Hann er með háþrýsting (e. hypertension) og verður ekki á hliðarlínunni í næsta deildarleik liðsins.
Hann er farinn aftur til Hvíta-Rússlands og gæti hann ákveðið að hætta með CSKA.
CSKA nýtti sér þá samfélagsmiðla í leiðinni með að fordæma ummæli rússneska umboðsmannsins Dmitri Celuk en hann sakar Goncharenko um kynþáttafordóma.
Celuk er umboðsmaður Cedric Gogoua, sem leikur með liðinu, en hann var ekki í liði CSKA sem tapaði fyrir Zenit á dögunum, 4-0.
Goncharenko var með þá Vladim Karpov, Igor Diveev og Viktor Vasin í vörninni gegn Zenit en Hörður Björgvin Magnússon kom þá inná sem varamaður í hálfleik. Arnór Sigurðsson byrjaði inn á en var skipt af velli á 64. mínútu. CSKA er í fimmta sæti deildarinnar og í baráttu um Evrópusæti.
Athugasemdir