Afturelding og Keflavík skiptu stigunum á milli sín er liðin áttust við í Lengjudeild kvenna í kvöld.

Keflavík gat með sigri farið upp fyrir Tindastól á toppi deildarinnar en Afturelding kom í veg fyrir það.

Dröfn Einarsdóttir kom Keflavík yfir á fjórðu mínútu en Alda Ólafsdóttir jafnaði fyrir heimakonur stuttu fyrir leikhlé. „Ég hélt að Keflavík ætlaði að gera út um leikinn á fyrstu 10 mínútunum en Afturelding náði með seiglu að vinna sig aftur inn í leikinn og uppskar jöfnunarmark rétt fyrir leikhlé," skrifaði Mist Rúnarsdóttir í beinni textalýsingu þegar flautað var til leikhlés.

Afturelding náði að halda út og lokatölur 1-1. „Liðin skipta stigunum á milli sín. Sanngjarnt þegar heilt er á litið. Þetta var gríðarlega harður baráttuleikur en báðum liðum skorti gæði á síðasta þriðjungi til að klára leikinn," skrifaði Mist þegar flautað var til leiksloka.

Tindastóll er á toppnum með einu stigi meira en Keflavík, en Stólarnir eiga líka leik til góða. Afturelding er í fjórða sæti með níu stig.