Zlatan er 36 ára og er á mála hjá Los Angeles Galaxy í MLS-deildinni. Hann gekk í raðir Galaxy frá Manchester United í mars síðastliðnum og er hann með 17 mörk í 22 leikjum í MLS-deildinni.

Zlatan hefur unnið deildartitla á flestum stöðum sem hann hefur spilað á. Hann hefur unnið deildartitla í Hollandi, á Ítalíu, á Spáni, í Frakklandi en ekki á Englandi eða í Bandaríkjunum. Hann vantar líka titil með uppeldisfélaginu, Malmö.

Í viðtali við sænska blaðamanninn Calle Schulman heldur hann dyrunum opnum fyrir Malmö.

„Ég hef fengið tilboð. Þeir sögðu mér að koma heim og enda ferilinn þar. Ég loka engum dyrum, þetta er titill sem mig vantar," sagði Zlatan og átti þar við sænska meistaratitilinn.

Zlatan er samningsbundinn LA Galaxy til loka árs 2020 og er ekki hægt að gera ráð fyrr en að hann gangi í raðir Malmö fyrr en þá, ef hann fer þ.e.a.s. til Malmö.

Landsliðsmaðurinn Arnór Ingvi Traustason er í dag á mála hjá Malmö og er að spila vel með liðinu.