Þegar Keegan stýrði liðinu árið 2008 áttu Dennis Wise, fyrrum leikmaður Chelsea, og viðskiptamaðurinn Tony Jimenez að sjá um leikmannakaup.

Keegan var langt frá því að vera sáttur með tvímenningana en leikmennirnir sem þeir fengu til félagsins voru flestir langt frá því að vera nægilega góðir. Þá fengu þeir leikmenn sem Keegan hafði ekki samþykkt að fá til liðsins.

Jimenez sagði nei við Luka Modric áður en Króatinn fór til Tottenham en í nýrri bók sinni segir Keegan frá því hversu litla þekkingu Jimenez hafði í raun og veru á fótbolta.

Bókin verður gefin út í næstu viku en Times birtir brot út henni í dag.

„Jimenez hafði sett sig í hlutverk fótboltasérfræðings en það kom í ljós að hann vissi lítið sem ekkert. Í umræðum um möguleg leikmannakaup viðurkenndi hann að hann vissi ekki hver Per Mertesacker væri," segir Keegan í bókinni.

„Það er erfitt að trúa þessu. Mertesacker hafði spilað sinn fyrsta landsleik fyrir Þýskaland fjórum árum áður."

„Hann var einn besti leikmaður HM 2006 og hjálpaði Þýskalandi að komast í úrslitaleikinn á EM 2008."

„Hann var einn besti varnarmaður Evrópu," sagði Keegan sem segist eiga margar aðrar sögur um þennan tíma hjá Newcastle. „Ég hafði aldrei kynnst öðru eins hjá fótboltafélagi."

Varð elskaður hjá Arsenal
Ef aðeins er talað meira um Mertesacker þá var hann hjá Werder Bremen á þessum tíma sem hann var í umræðunni hjá Keegan og félögum í Newcastle.

Mertesacker var keyptur til Arsenal árið 2011 og varð síðar fyrirliði liðsins. Hann er elskaður af stuðningsmönnum Arsenal en er í dag starfandi hjá akademíu félagsins.

Hann spilaði meira en 200 leiki fyrir Arsenal og hefði án efa getað reynst Newcastle vel.