Í sjötta þætti Fimleikafélagsins er fylgst með mönnunum á bekknum sem sjá til þess að allt gangi snuðrulaust fyrir sig í undirbúning leikja og á meðan þeim stendur. Liðsstjórninni.
Fylgst er með þeim Ása Haralds aðstoðarþjálfara, Róberti Magnússyni sjúkraþjálfara, Gaua styrktarþjálfara og Ólafi Guðmundssyni liðsstjóra. En Ólafur hefur starfað sem liðsstjóri í sjálfboðastarfi síðan 2002, einungis misst af einni Evrópuferð liðsins og farið til yfir 18 landa með liðinu.
Myndavélar eltu þá síðustu dagana fyrir og á leik liðsins gegn Víking Reykjavík síðastliðin sunnudag. Leikurinn varð fyrir margar sakir ansi forvitnilegur.
FH á strembið verkefni framundan, en liðið þarf að leggja Val og Stjörnuna í síðustu tveimur leikjum tímabilsins og treysta á að KR tapi stigum til að eiga séns á Evrópusæti. Næsti leikur liðsins er gegn Val í Kaplakrika á sunnudag kl. 14.00.
Horfa má á þáttinn í spilaranum að ofan eða neðst í fréttinni en FH réðst fyrir nokkrum vikum í þáttaröð um liðið. Þessi þáttur er hluti af þeirri þáttaröð.
„Fórna mér fyrir lest fyrir þennan mann"
Segja má að Ólafur liðsstjóri FH hafi stolið senunni í nýjasta þættinum en á Twitter skapaðist umræða um hann.
Anton Ingi Leifsson, fréttamaður á Vísi, birti skjáskot úr þættinum þar sem verið er að ræða við Ólaf. Tveir fyrrum leikmenn FH settu athugasemdir við færsluna.
„Nicest guy you will ever meet," skrifar Sam Hewson, núverandi leikmaður Grindavíkur en hægt er að þýða það yfir á íslensku sem: „Vingjarnlegasti maður sem þú munt nokkurn tímann hitta."
Bergsveinn Ólafsson, sem leikur með Fjölni í dag, gekk aðeins lengra og sagði:
„Myndi fórna mér fyrir lest fyrir þennan mann!"
Ólafur greinilega mjög vel liðinn í Kaplakrikanum en hann hefur starfað þar, eins og segir að ofan, frá árinu 2002.
Nicest guy you will ever meet #king
— sam hewson (@s_hewson15) September 21, 2018
Myndi fórna mér fyrir lest fyrir þennan mann!
— Bergsveinn Ólafsson (@BergsveinnOlafs) September 21, 2018
Athugasemdir